طريقة تحضير السينابون

طريقة تحضير السينابون

المكونات ( تكفي 16 قطعة )

1كوب ماء دافئ
معلقة ونصف كبيرة سكر
معلقة صغيرة بيكنج بودر
رشة ملح ورشة فانيليا
معلقة كبيرة ونصف زبدة سايحة
1بيضة
نصف باكيت كريم شانتيه
4معالق كبيرة لبن بودرة
من 4ل4 ونصف كوب دقيق(حسب احتياج العجينة)
كريمة لباني لسقي السينابون

معلقة كبيرة خميرة

الحشوة ( لمقدار 16 قطعه )

نصف كوب سكر
معلقة كبيرة كاكاو
معلقتين كبار قرفة

نصف كوب زبدة لتغليف العجينة

صوص السينابون الأبيض ( مقدار 16 قطعه )

معلقة كبيرة ونصف زبدة
معلقة كبيرة لبن
كوب إلا ربع سكر بودرة
ربع كوب جبنة كريمي أو مثلثات أو كيري

طريقة التحضير

في بولة ننزل كوب ماء دافئ ومعلقة خميرة ومعلقة ونصف سكر ونقلبهم مع بعض ونسيبهم 10 دقائق.

بعدين ننزل بيضة ومعلقة ونصف كبيرة زبدة ورشة ملح ورشة فانيليا و4 معالق كبيرة لبن بودرة ومعلقة صغيرة بيكنج بودر ونصف باكيت كريم شانتيه و4 كوب دقيق ونقلبهم كويس ونعجن العجينة كويس (هنلاقيها بتلزق شوية هي بتكون كده) .

ونسيبها تختمر ساعة.

طريقة الحشوة

في طبق ننزل نصف كوب سكر ومعلقة كاكاو ومعلقتين قرفة ونقلبهم مع بعض (كده الحشوة جاهزة).

طريقة الصوص الأبيض

في بولة ننزل معلقة كبيرة ونصف زبدة و8 مكعبات جبنة كيري ومعلقة كبيرة لبن ونضربهم بالمضرب كويس مع بعض وننزل كوباية إلا ربع سكر بودرة ونضربهم تاني كويس (كده الصوص جاهز) .

هنجيب العجينة نفردها كويس علي شكل مستطيل وندهنها زبدة ونبدأ ننزل عليها الحشوة ونفردها عليها كويس ونبدأ نلفها رول ونقطعه بخيط أو سكينة حامية ونجيب صينية فيها ورقة زبدة ومدهونة زيت نرص السينابون جمب بعض.

ونسيبه يرتاح نصف ساعة( 30 د).

هنجيب علبة كريمة لباني وننزل بيها علي السينابون (بتخلي السينابون وهمي وطري جدااااا)
وندخله الفرن من تحت بس من (15ل 20 د).

نطلعه نسيبه يهدي شوية ونبدأ ننزل عليه الصوص الأبيض وصوص شيكولاتة أو كراميل زي ما نحب.

ملحوظة (مش بنحط الصوص الأبيض عليه كله غير لو هتاكليه في وقتها غير كده كل ما تأكلي قطعه حطي عليها الصوص).

اقرأ المزيد من الموضوعات على صحيفة هتون الدولية من هنا.